2025/26 yilgi mavsum yakunlariga ko‘ra, yevrokuboklardagi ishtiroki uchun eng ko‘p mukofot puli olgan klublar ro‘yxatini «PSJ» boshqarib bormoqda.

Chempionlar ligasi finalidagi g‘alaba va UYEFA Superkubogi yo‘llanmasini qo‘lga kiritish orqali Parij klubi bir kunning o‘zida qo‘shimcha 10,5 mln yevro ishlab oldi. Football Meets Data xabariga ko‘ra, «PSJ» mavsumni 145,9 mln yevro (Superkubokni hisobga olganda 149,9 mln) mukofot puli bilan yakunladi.

Finalchi «Arsenal» esa 143,2 mln yevro ishlab topib, ro‘yxatda ikkinchi bo‘ldi.

Mavsum davomida 100 mln yevrolik dovondan o‘tgan jamoalar yettitani tashkil etdi. Bular: «PSJ» (145,9 mln €), «Arsenal» (143,2 mln €), «Bavariya» (127,3 mln €), «Liverpul» (109,5 mln €), «Atletiko» (104,2 mln €), «Real» (102,6 mln €) va «Barselona» (100,3 mln €).