Кеча дунёнинг бир неча мамлакатларида Девис кубоги-2013нинг дастлабки босқич ўйинлари бошланди. Осиё ва Океания минтақасининг 1-зонасида иштирок этаётган Ўзбекистон терма жамоаси Намангандаги "Паҳлавон" спорт мажмуасида Хитойга қарши баҳсларга киришди.

Мусобақанинг биринчи кун ўйинлари жуда шиддатли ва драматик тарзда ўтди. Ўзбекистоннинг биринчи ракеткаси, АТР рейтингида 46-ўринни эгаллаб турган Денис Истомин қуръага кўра баҳсларни биринчи бўлиб бошлади. Унинг рақиби Хитойнинг иккинчи рақамли теннисчиси Ди Ву бўлди (АТР рейтингида 185-ўрин).

Рейтингдаги катта фарққа қарамай, хитойлик ракетка устаси ўйинни фаол бошлади. Истомин эса дастлабки 2та сетда оддий хатоларга йўл қўйди. Натижада рақибининг геймида 2та очкони қўлга киритган Хитойнинг иккинчи рақамли теннисчиси 6:4, 6:4 ҳисобида ғалаба қозониб, 2:0 ҳисобида олдинга чиқиб олди. Учинчи сет эса тай-бреккача етиб борди. Унда Истомин ғалаба қозонишнинг уддасидан чиқди — 7:4.

Тўртинчи сетни 7:5 ҳисобида якунлаган Денис, бешинчи сетда рақибга ҳеч қандай имконият қолдирмади — 6:2. Умумий ҳисоб — 3:2.

Куннинг иккинчи баҳси ҳам деярли 4 соатга чўзилди. Зе Жанг 1-сетни ўз фойдасига ҳал қилди — 6:4. Иккинчи сет тақдири эса тай-брекда ҳал бўлди ва унда Фаррух Дўстов ғалаба қозонди — 10:8.

Учинчи сет яна ҳамюртимиз фойдасига ҳал бўлган бўлса (6:4), тўртинчи сетда Жанг ғалаба қозонди (6:3).

Ҳал қилувчи сет ҳам муросасиз кечди. Ҳар иккала теннисчи ўз геймини ютиб борди ва ҳисоб 5:4 га етди, Фаррух фойдасига. Ўнинчи геймни хитойлик теннисчи тўпни ўйинга киритди. Дастлабки 3та тўп узатишини ютиб олган ҳамюртимиз, ҳисобни 0-40га етказди. Жанг эса 2та тўп узатишидан сўнг очкони қўлга киритди — 30-40. Хитойнинг 1-рақамли ракеткаси геймда ҳисобни тенглаштириши мумкин эди. Аммо у тўр ёнига чиқиб, очкони ўз ҳисобига ёзиб қўйиши мумкин бўлган оддий вазиятда хатога йўл қўйди. Бешинчи сет 6:4 ҳисобида Фаррух Дўстов фойдасига ҳал бўлди.

Бугун турнирда жуфтликлар ўртасида баҳс бўлиб ўтади. Ўйин 12:00да бошланади ва у спорт канали орқали тўғридан-тўғри намойиш қилинади. Дўстон/Истомин жуфтлиги Мао Син Гонг/Же Ли жуфтлигига қарши кортга чиқади.

Девис кубоги. Осиё ва Океания минтақаси. 1-зона.
ЎЗБЕКИСТОН - ХИТОЙ - 2:0
Денис Истомин - Ди Ву - 3:2 (4-6, 4-6,  7-6 (4), 7-5, 6-2)
Фаррух Дўстов - Зе Жанг - 3:2 (4-6, 7-6 (8), 6-4, 3-6, 6-4)