Топ-5га кирмаган чемпионатларда ҳам юқори савияли ва истиқболли футболчилар бор.

Улардан бири Сантьяго Хименесдир. Ўтган мавсумда «Фейеноорд» форварди Мексика чемпионатидаги натижаларни ҳисобга олган ҳолда барча мусобақаларда 50 ўйинда 28та гол урди. Жорий кампанияда эса 22 ёшли ҳужумчи 28 учрашувда иштирок этиб, 26та голни уриб қўйди. Мексикалик иқтидор бутун дунё у ҳақида билиши учун навбатдаги қадамини ташлаши керак, яъни топ-клубга ўтиш. Ва бу борган сари ҳақиқатга айланадиганга ўхшамоқда.

Тахминан бир ой олдин функционер Моррис Паньелло Хименеснинг отаси, собиқ футболчи ўғлининг манфаатларини ҳимоя қилса-да, у деярли 18 ойдан бери улар билан маслаҳатчи сифатида ишлаётганини айтди. Паньелло, шунингдек, бир нечта топ-клублар вакиллари Хименесни аввалги трансфер ойналарида ҳам сотиб олишни исташганини айтди. «Биз «Атлетико» билан музокара олиб борганмиз. Шунингдек, «Интер», «Милан», «Лацио» ва «Наполи» билан ҳам гаплашдик. Менимча, у «Интер» ва «Ювентус» учун идеал бўлиши мумкин. Улар унинг учун энг яхши вариант бўлади. Турли клубларга унга ишонишни маслаҳат бердим, унинг қиймати 12 ойдан камроқ вақт ичида 10 миллион евродан 40 миллион еврога кўтарилди. Ҳозирда унга энг яқин бўлиб турганлар - «Реал» ва «Тоттенхэм»дир».

Унинг келажаги ҳақидаги суҳбатлар тинимсиз давом этмоқда. Агар футболчи юқори савияда ўйнаса, бу нормал ҳолат. Хименес Эредивизионни Луис Суаресдан кейин ҳеч ким қилмаган тарзда парчаламоқда. Уругвайлик футболчи бир календарь йилида чемпионатда 30та гол урганди. 2023 йилда эса 33та голни расмийлаштирди. 2022 йилнинг ёзида Мексиканинг «Круз Асул» жамоасидан «Фейеноорд»га атиги 6 миллион еврога тушган футболчи учун ёмон эмас.

Мураббий Арне Слотнинг талабларини, айниқса, ҳимоявий нуқтаи назардан тушуниш учун унга бироз вақт керак бўлди. Голлар ҳам дарҳол келмади. 2022/23 йилги мавсумнинг биринчи ярмида Сантьяго Эредивизияда бор йўғи икки марта гол урди. Аввалига у ротация ўйинчиси эди, чунки Слот ҳужумда бошқа ҳужумчини афзал кўрди. Аммо мексикалик футболчининг катта салоҳияти бор эди, масалан, Европа лигасида «Лацио»га қарши ўйинда у 27 дақиқада дубл қайд этган.

Мавсум давомида Хименес ўзини ишончли ҳис қила бошлади. Слот ҳам унга тобора кўпроқ ишона бошлади. Сантьяго феврал ойида «Фейеноорд»нинг асосий ҳужумчисига айланди ва жамоанинг чемпионлик ғалабасида муҳим рол ўйнади ва кетма-кет 9та ўйинда гол урди. Футболчининг яхши формаси мантиқан уни ЖЧ-2022 учун миллий терма жамоага кира олмаганидан сўнг Мексика таркибига киритилишига олиб келди.

Сантьяго фаолиятини ярим ҳимоячи сифатида бошлаган. Дастлаб бироз уятчан ва ноқулай ҳисобланган бўлса-да, у хавфли тўпурарга айланди, ёшлар даражасида 4 мавсумда 100та гол урди. Сантьяго 16 ёшида профессионал дебют қилган. Дастлаб у «Фейеноорд»нинг таклифига ишонмади, шубҳа қилди. Аммо отаси Нидерландия унинг ривожланиши учун идеал жой бўлишига ишонган ва вақт кўрсатганидек, у ҳақ эди.

Хименеснинг ўйинида ҳали ҳам камчиликлар бор, бу ёш футболчи учун тушунарли. Слот ҳали ҳам ҳимояда ундан кўпроқ нарсани талаб қилади. Мураббийнинг фикрича, Сантьяго баъзида концентрацияни йўқотади, бу эса ўз навбатида прессинг учун тўғри позицияни танлашга тўсқинлик қилади. Мутахассиснинг фикрича, тўғри босим ўтказилса, мексикалик ўз фаолиятини янада яхшилаши мумкин.

«Дунёнинг нариги томонига ўтганингизда, мослашиш учун доим вақт керак бўлади, - деди «Фейеноорд»нинг собиқ ҳужумчиси Дирк Куйт. - Аммо у жуда тез мослашди ва бошида ҳар бир ўйинда қатнашмаганида хафа бўлмади. У мураббийни диққат билан тинглаб, ўзидан мураббий уни қандай бўлишини хоҳлаётганини сўради. Тўпга эга бўлган ўйинчилар одатда нима қилишни билишади, лекин у тўпни йўқотиб қўйганда ҳам жамоа учун жуда муҳим бўлиб қолади. Бу вақт давомида у жуда яхши ривожланди ва уни яхшилаши мумкин бўлган кўп нарса бор».

Хименес аллақачон «Фе­йеноорд»нинг асосий зарба берувчи кучи ҳисобланади. Клуб афсонаси Жованни ван Бронкхорст таъкидлаганидек, усиз асосий таркибда бутунлай бошқа жамоа пайдо бўлади ва мексикаликнинг голлари одатий ҳолга айланиб бормоқда. Бу мавсумда Сантьяго аллақачон 2та хет-трик ва Эредивизияда 3та дубл қайд этди. Эътиборлиси, у Чемпионлар лигасида ҳам «Лацио»га қарши ўйинда 2та гол урди.

Мухлислар Европанинг бой клубларидан бири «Фейеноорд»га Роттердам рад эта олмайдиган таклиф билан чиқса, Хименес шу ойда сотилиши мумкинлигидан хавотирда. Нидерландларнинг мақсади энг яхши футболчисини ҳеч бўлмаганда мавсум охиригача сақлаб қолиш. Бироқ, айниқса, ҳозир сермаҳсул ҳужумчиларга талаб қанчалик юқори эканлигини ҳисобга олсак, футболда ҳеч нарса кафолатланмайди.

А.АҲМЕДОВ тайёрлади