Мана кўпчилик кутган чемпионлар лигасининг плеф-офф баҳслари бошланди. Бу учрашувлар орасида барчанинг эътибори «Реал Мадрид» ҳамда «Манчестер Юнайтед» ўйинига қаратилиши аниқ.
Чунки дунёнинг энг буюк жамоаларидан иккитаси бугун Мадриддаги ажойиб стадионда саф тортишади. Бу ўйинда ким ғалаба қозониши ёки кимнинг ўйин қаҳрамонига айланиши унча муҳим аҳамиятга эга эмас, бизнингча. Бу ўйинда мухлислар фақат ва фақат ютишади. Ҳар лаҳзада Криштиану Роналду фантастик зарблар бериши, бу зарбаларга Робин ван Перси оригинал фикрлари билан жавоб қайтариши мумкин. Ёки бўлмаса Жозе Моуриньюнинг «қувлик»ларига сэр Алекс Фергюсон эскирмайдиган ғоялари билан жавоб қайтариши мумкин. Хуллас бу учрашувда қарама-қаршиликлар жуда кўп ва хўп.
Бугун «Барселона» мухлислари ҳам «Манчестер Сити» фанатлари ҳам бу ўйинни аниқ кўришади. Чунки бу ўйинни кўриш фақатгина бахт. Бундай бахтдан баҳра олиш ниятида бўлган миллиардлаб мухлислларга ҳавас қилса арзийди. Демак дунёдаги энг катта оила - футбол оиласи энг катта ўйинни кутмоқда. Катта ўйин олдидан бемалол эҳтиросларга берилаверинг чунки эҳтирослар айни шундай кунларда чўққига етади!
