Лига профессионал футбол клублари пойдеворига жиддий эътибор қаратаётгани маълум. Суперлига ва Пролига клуби ОФК лицензиялаш талабини бажара олиши лозим. Бунда албатта клуб тарбияланувчиси масаласи муҳим роль ўйнайди.

MyLeague платформаси орқали рўйхатдан ўтказилаётган футбол клубларидаги ҳолат суратда аниқ кўрсатиб ўтилган. 5 та футбол клуби ўз академиясига эга. Яна 5 та клуб қошида эса футбол мактаби фаолият юритмоқда.

ЎФА ҳудудий академияларининг тенг ярми ўз вилоятининг асосий жамоаси билан ҳамкорликда ишлаш бўйича уч томонлама келишувга эришди. Бунда ҳудудий академия ҳамда профессионал футбол клуби шартнома давомида бир тизимда фаолият олиб боради. Шунингдек, 3 та клуб ҳудудий футбол мактаби билан ҳамкорликда ишлашга қарор қилди.

Миллий олимпия қўмитаси қошида ташкил этилган "Олимпик" жамоаси Одил жуниор футбол мактаби билан келишувга эришган. Пролига иштирокчиси бўлган "Олимпик Мобиуз" эса Тошкент шаҳридаги ҳудудий футбол академияси билан ишлайди.

5 йиллик ривожланиш дастури асосида ўз футбол мактабига эга бўлган футбол клублари уни академияга айлантириш устида ишлаши кўзда тутилган. Шунингдек, ЎФА ҳудудий академиялари ҳамда мактаблари билан ҳамкорлик қилаётган футбол клублари ҳам келажакда бевосита клуб структурасида бўлган футбол мактабини ташкил этиши лозим.

Лига эса профессионал футбол клуби структурасида мавжуд профессионал ва ҳаваскор футболчилар рўйхатини онлайн шакллантириб боради ва шу орқали ҳаваскор футболчининг то профессионал карерасигача бўлган йўналиши ҳақида маълумотлар базасини шакллантиради.