Аввалроқ Дани Алвес суддан олдин Бразилияга қочиб кетмоқчи бўлган ҳақида хабар берилган эди. Бугун, 22 февраль куни Алвеснинг зўрлаш иши бўйича чиқарилган ҳукм тафсилотлари маълум бўлди.

Суд “Барселона” ва Бразилия терма жамоасининг собиқ футболчисини 2022 йил декабрь ойида Барселонадаги “Саттон” тунги клубида қизни зўрлаганликда айбли деб топиб, қилган жинояти учун 4,5 йилга озодликдан маҳрум қилди.

Ҳақиқий жазонинг 4,5 йилидан ташқари, Алвес яна 5 йил шартли қамоқ жазосига ҳукм қилинди. Дани жабрланувчига 150 минг евро тўлаши ва бундан ташқари барча суд харажатларини қоплаши керак бўлади. Собиқ футболчига 9,5 йил давомида жабрланувчига яқинлашиш тақиқланган.

Суд жабрланувчининг жинсий алоқага рози бўлмагани ва зўрлаш аломати борлиги исботланганини билдирган.

Маълумот учун, Дани Алвес 1983 йилда туғилган. Фаолиятининг катта қисмини “Барселона”да ўтказган футболчи жамоа билан клуб доирасидаги барча мукофотларни қўлга киритган. Жумладан, 3 бора Чемпионлар Лигаси ғолиблиги, УЕФА суперкубоги ҳамда Клублар ўртасидаги Жаҳон чемпионлиги айнан шу клуб билан қўлга киритилган.

Бразилиялик футболчи УЕФА суберкубоги ғолиблигини  4 бора қўлга киритган ва бу борада Мальдини билан энг яхши натижани кўрсатиб турибди.

Алвес турли клубларда Италия ва Франция чемпионатлари ғолиблигини ҳам нишонлаган.

Терма жамоа сафида футболчи Ёшлар ўртасидаги Жаҳон Чемпиони, 2 бора Америка кубоги ва шунча бор Конфедерация кубоги ғолиби бўлган.