Лондоннинг "Челси" клуби бош мураббийи Маурисио Почеттино "Тоттенхэм" бош мураббийи Анж Постекоглу муваффақиятини юқори баҳолади.
Австралиялик мутахассис қўл остидаги "шпорлар" Англия Премьер-лигасида Чемпионлар лигаси зонасидан 7 очко ортда қолиб, бешинчи ўринни эгаллаб турибди. Шу билан бирга, "Тоттенхэм"нинг захирада иккита учрашуви бор.
"Постекоглу "Тоттенхэм" мухлисларига умид қайтарди. Жамоа яхши футбол ўйнайди. Янги мамлакатга келиш ҳар доим қийин. У ажойиб иш қиляпти", - деди Почеттино матбуот анжуманида.
Эслатиб ўтамиз, Маурисионинг ўзи 2014 йилдан 2019 йилгача "Тоттенхэм"ни бошқарган. Аргентиналик мураббий жамоа билан бирорта ҳам соврин юта олмади, аммо у уларни Чемпионлар лигаси финалига олиб чиқди.
