Кеча, 1-май куни “ПСЖ” Чемпионлар лигасининг биринчи ярим финал учрашувида Дортмунднинг “Боруссия” клубига имкониятни бой берди.

“Сигнал Идуна Парк” стадионида кечган учрашув 0:1 ҳисобида парижликларнинг мағлубияти билан якунланди.

Шу тариқа, "ПСЖ" 2023-2024 йилги мавсумда илк бор гол урмасдан ўйинда мағлуб бўлди. Париж клуби "асаларилар" дарвозасига 14 та зарба йўллади, шундан 3 таси нишонга аниқ борди.

Умуман олганда, "ПСЖ" жорий мавсумда беш марта мағлуб бўлди: Лига 1да битта мағлубият ("Ницца"дан - 2:3) ва Чемпионлар лигасида тўртта ("Ньюкасл"дан - 1:4, "Милан" (1:2), "Барселона" (2:3) ва “Боруссия” (0:1)).

Жавоб ўйини 7 май куни "Парк де Пренс" стадионида бўлиб ўтади.

Сўнгги турда "ПСЖ" "Барселона"ни мағлуб этди (умумий 6:4). «Боруссия» «Атлетико»дан кучлироқ бўлиб чиқди (умумий ҳисобда 5:4).