"ПСЖ" ва Франция терма жамоаси ҳимоячиси Люка Эрнандес Чемпионлар лигаси доирасидаги Дортмунднинг "Боруссия" клубига қарши биринчи ярим финал ўйинида чап тиззасининг олдинги хоч боғламини йиртиб олди. Бу ҳақда клуб матбуот хизмати расман хабар берди.

Футболчи яқин кунларда жарроҳлик амалиётидан ўтиши, сўнгра узоқ муддат тикланиши керак бўлади.

Шу тариқа, Эрнандес Германияда бир ярим ойдан кейин бошланадиган Европа чемпионатида Франция термасига ёрдам бермаслиги аниқ бўлди. Одатда, бундай жароҳатлардан сўнг футболчилар олти ойдан кўпроқ даволанади, демак, Эрнандесни фақат кейинги мавсум майдонда кўришимиз мумкин.