Антонио Матеу Лаос Маттейс де Лигтнинг "Реал" дарвозасига киритган голини бекор қилган эпизодни баҳолади.
Чемпионлар лигаси ярим финалидан ўрин олган “Реал” – “Бавария” (2:1) учрашувининг қўшиб берилган вақтининг 13-дақиқасида меҳмонлар ярим ҳимоячиси Йозуа Киммих жарима майдончаси ичига оширди. Тўпни Томас Мюллер боши билан ҳимоячи Маттейс де Лигт томон етказди ва де Лигт Мадрид дарвозасига зарба берди.
Бош ҳакам Шимон Марчиняк Мюллернинг узатмасидан бир лаҳза олдин ҳуштак чалди ва Киммих тўпни тўплаган пайтда яқин атрофда бўлган де Лигт ёки Носсаир Мазрауини офсайдда қолган деб ҳисоблади.
Кейинроқ лайнсмен узр сўради ва ўша эпизодда байроқни кўтариб хато қилганини айтди.
"Ҳеч ким хоҳламаган фалокат юз берди. Ҳуштак ВАР ёрдам беришига халақит берди. Ҳакамлик нуқтаи назаридан содир бўлиши мумкин бўлган энг ёмон нарса содир бўлди. ВАР ёрдам бера олмади.
Ўйин лайнсменнинг байроқни кўтариши билан эмас, балки ҳакамнинг ҳуштаги билан тўхтатилади. Ҳакамлар ҳам спортчи ва улар ҳам хатога йўл қўйишади", - деди испаниялик собиқ рефери.
