Олий лига вакили “Бухоро”ни 1:0 ҳисобида мағлубиятга учратган “Машъал” жамоаси бош мураббийи Александр Хомяковнинг ўйиндан кейинги фикрлари қуйидагича бўлди.

- Бугунги ўйиндаги ғалаба мени ниҳоятда қувонтирди, - дея сўз бошлади Александр Андреевич.  - Биласиз, олдимизга бир йил ичида олий лигага қайтиш вазифаси қўйилган ва бунинг учун аввало йигитларда ғалабага бўлган ишончни шакллантиришга тўғри келади. Бунинг учун эса мана шундай беллашувларда ғалаба қозониш лозим. Шогирдларимга раҳмат, улар бутун ўйин давомида кўрсатмаларимни бехато бажаришди.

- Ўйин сизга ёқдими?
- Тўғри, камчиликлар йўқ эмас, лекин битта учрашувдан иборат Кубокнинг ушбу босқичида зафар қучиш барибир ёқимли. Баҳс якунига етгач, кўпчилик олдимга келиб ғалаба билан табриклади ва жамоам чиройли футбол намойиш этганини айтди. Бизнинг вазифамиз “Машъал” мухлисларини хурсанд қилиш. Агар кўрсатаётган ўйинимиз уларга ёққан экан, демак тўғри йўлдан кетяпмиз.