Франция терма жамоаси ҳужумчиси Килиан Мбаппенинг ҳимоя ниқоби илгари FIFA деб номланган EA Sports FC видео ўйинида пайдо бўлди. Бу ҳақда Footmercato хабар бермоқда.
Эслатиб ўтамиз, Европа чемпионати - 2024 биринчи тур учрашувида Мбаппе Австрия терма жамоаси ҳимоячиси билан тўқнашган ва натижада бурни синган эди. 25 ёшли ҳужумчи Нидерландияга қарши ўйинни ўтказиб юборди ва Польша билан учрашувга махсус ниқобда чиқди.
Гуруҳ босқичи якунларига кўра, Франция терма жамоаси D квартетида иккинчи ўринни эгаллаб, плей-офф босқичига йўл олди. 1/8 финал доирасида Дидье Дешам шогирдлари Бельгия билан куч синашади. Ўйин 1 июль куни бўлиб ўтади.