"Реал"нинг собиқ бош мураббийи Зинедин Зидан футболчи сифатидаги фаолиятидаги энг яхши стадиони ҳақидаги саволга жавоб берди.
"Энг яхши стадион? "Бернабеу"! Бу топ, топ, топ... Мен учун "Сантьяго Бернабеу" биринчи рақамли стадион. Одамлар, стадион, ҳамма нарса, клуб тарихи - ҳаммаси яхши", - деди Зидан Madrid Xtra билан суҳбатда.
Эслатиб ўтамиз, Зинедин Зидан "Реал"ни 2016-2018 ва 2019-2021 йилларда бошқарган. Франциялик мураббий "Лос Бланкос" билан биргаликда икки карра Испания чемпиони, икки карра Испания Суперкубоги ва уч карра Чемпионлар лигаси ғолиби бўлди.
Зидан футболчи сифатида “Канн”, “Бордо”, “Ювентус” ва “Реал”да ўйнаган. ФИФА уни уч марта йилнинг энг яхши футболчиси деб эълон қилган. Зидан 2006 йилда футболчилик фаолиятини якунлаган.
