Таиланднинг “Бурирам Юнайтед” клуби мураббийлар штабида ўзгариш юз берди.
“Бурирам Юнайтед”ни клуб тарихида биринчи бор Осиё Чемпионлар лигаси плей-офф босқичига олиб чиққан Аттапхол Буспаком кутилмаганда гуруҳ босқичи ўйинлари якунланиши биланоқ истеъфога чиққанлиги ҳақида хабар бериб ўтгандик. Воқеалар ривожи бундай тус олишига мураббий ва клуб раҳбарияти ўртасида юзага келган келишмовчилик сабаб бўлган.
Таиландликлар бош мураббий масаласида узоқ бош қотиришгани йўқ. Клубда 2011 йилдан буён фаолият кўрсатиб келаётган англиялик мутахассис Скот Купер бундан буён бурирамликларга устозлик қилади. Клуб раҳбарияти ОЧЛдаги муваффақиятларда Купернинг ҳам ҳиссаси катта эканлигини қайд этган. Чунки инглиз мутахассиси аввалги бош мураббий Аттапхол Буспакомнинг биринчи ассистенти бўлиб ишлаб келаётганди.
Эслатиб ўтамиз, Осиё Чемпионлар лигаси 1/8 финали биринчи учрашувлари доирасидаги “Бурирам Юнайтед” – “Бунёдкор” учрашуви 14 май куни Тошкент вақти билан соат 16:00да бошланади.
