Антонио Матеу Лаос "Атлетико Мадрид"га қарши ўйинда пенальти вақтида ВАР аралашмаганидан ҳайратда қолди.

Кеча Диего Симеоне шогирдлари Чемпионлар лигаси умумий босқичи 3-туридан ўрин олган баҳсда ўз майдонида "Лилл"га имкониятни бой бериб қўйди (1:3).

74-дақиқада 1:1 ҳисоби қайд этилаётган бир пайтда Бенжамин Андре Коке билан тўп учун курашаётганда йиқилиб тушди ва италиялик ҳакам Марко Гуида “Атлетико” дарвозасига пенальти белгилади.

11 метрлик зарбани Жонатан Дэвид аниқ амалга оширди. "Атлетико" ушбу эпизод юзасидан УEФАга мурожаат қилди.

“2021-йилда мен нотўғри пенальтини белгилагандим ва бир неча сония футболчиларни кузатганимдан сўнг ВАР ҳакамидан такрорий ўйинни кўрсатишини илтимос қилдим.

Бу Будапештдаги Европа чемпионатида содир бўлди ва буни ҳеч қандай тарзда изоҳлаб бўлмайди. Эҳтимол, у хато қилгандир, чунки у ҳам оддий одам.

ВАР футболга ёрдам бериш учун пайдо бўлган. Ҳамкасбимнинг ВАР бўйича тажрибаси кам эди. ВАРдагилар зудлик билан бош ҳакамга кўрмаган нарсаларни кўриш имкониятини беришлари керак эди" - деди собиқ ҳакам.