Испаниялик собиқ ҳакам Пахарес Пас кутилмаган ноқулай ҳолатга тушиб қолди.
ТВ-каналнинг жонли эфири вақти унинг тўтиқуши қўққисдан «Реал Мадрид» мадҳиясини куйлади. Ажабо, қушга «Қироллик клуби» гимнини ким ўргатганикин...?
Ғалати воқелик. Собиқ ҳакам ўз уйида туриб, жонли эфирда узатиладиган El Chiringuito кўрсатувига уланди. Пахарес Пас қайсидир масалада гапираётган вақт эса унинг ортида турган тўтиқуш бирдан «Реал Мадрид» мадҳиясини куйлай бошлади. Шунда собиқ ҳакам турли имо-ишоралар билан қушни тўхтатишга уринди, аммо у гимнни куйлашдан тўхтагани йўқ.
Изоҳ. Кейинги сафар кўрсатув муаллифлари Пасни студияга чақиришди (кўринишидан, кутилмаган воқелик қайта такрорланмаслиги учун). Хуллас, собиқ рефери тўтиқуш хонишига тўхталиб, ўзини оқлади. Аниқроғи, қуш аслида қизиники эканлигини таъкидлади.
Ғалати қушлар. Пахарес шунингдек, жонли эфирда Ла Лиганинг яна бир собиқ ҳаками тўтиқушининг нозик томони ҳақида сўзлаб берди. «Уризар Аспитарте ҳам гапирувчи тўтиқуш боқади. Эсимда, бир сафар унинг уйига борганимда, қуш ногаҳон сўз қотди: «Атлетик», «Атлетик»! «Барса» иборасини эшитганида эса, тилидан бошқача сўз чиқди: «Жўжахўрозлар!» - деди Пахарес Пас.
