Мюнхеннинг “Бавария” клуби ҳужумчиси Харри Кейн Миллатлар лигаси доирасидаги Грецияга қарши ўйинда Англия терма жамоасининг асосий таркибида майдонга тушмаслиги мумкин.
Пайшанба оқшомида инглизлар гуруҳ ғолиби тақдири ҳал бўлиши мумкин бўлган энг муҳим учрашувини ўтказади. Ли Карсли шогирдлари ҳам ўтган ой "Уэмбли"даги мағлубият учун греклардан ўч олишга ҳаракат қилишади.
Гарчи Кейн миллий терма жамоа билан Афинага борган ва жароҳат олмаган бўлса-да, The Guardian нашри Англия терма жамоаси сардори бўлажак ўйинда асосий таркибга киритилмаслигини кутмоқда.
Хабарларга кўра, Карслининг Кейнни захирага ўтказиш қарори кийиниш хонасида ҳайрат билан кутиб олинган.
Кейн ўрнига "Астон Вилла" вакили Олли Уоткинс асосий таркибда майдонга тушади.
