Myunxenning “Bavariya” klubi hujumchisi Xarri Keyn Millatlar ligasi doirasidagi Gresiyaga qarshi o‘yinda Angliya terma jamoasining asosiy tarkibida maydonga tushmasligi mumkin.
Payshanba oqshomida inglizlar guruh g‘olibi taqdiri hal bo‘lishi mumkin bo‘lgan eng muhim uchrashuvini o‘tkazadi. Li Karsli shogirdlari ham o‘tgan oy "Uembli"dagi mag‘lubiyat uchun greklardan o‘ch olishga harakat qilishadi.
Garchi Keyn milliy terma jamoa bilan Afinaga borgan va jarohat olmagan bo‘lsa-da, The Guardian nashri Angliya terma jamoasi sardori bo‘lajak o‘yinda asosiy tarkibga kiritilmasligini kutmoqda.
Xabarlarga ko‘ra, Karslining Keynni zaxiraga o‘tkazish qarori kiyinish xonasida hayrat bilan kutib olingan.
Keyn o‘rniga "Aston Villa" vakili Olli Uotkins asosiy tarkibda maydonga tushadi.
