Ҳиндистоннинг Калькутта шаҳрида Tata Steel Chess India турнири бўлиб ўтмоқда. Мукофот жамғармаси 41500 АҚШ долларини ташкил этадиган турнирда ўзбекистонлик Нодирбек Абдусатторов ҳам иштирок этаётганидан хабарингиз бор.

Бугун мусобақанинг рапид йўналишида яга 3 та тур ўйинлари ўтказилди. Абдусатторов мезбон спортчилари — Нихал Сарин ва Видит Сантош Гужаратҳи билан дуранг қайд этди. Кун якунида ҳамюртимиз яна бир ҳиндистонлик шахматчи Сунилдут Нараянанни мағлуб этди.

Натижада Нодирбекнинг очколари 4,5 тага етди. Бугун 3 та ўйинда ғалаба қозонган Магнус Карлсен 5 очко билан пешқадам бўлиб турибди. АҚШлик Уэсли Со 3,5 очко билан учинчи ўринни эгаллаб турибди.

Эртага рапид йўналишида ғолиблар аниқланади. Абдусатторовни Уэсло Со, Аржун Эригаиси ва Магнус Карлсенга қарши жанглар кутиб турибди.

16 ва 17 ноябрь кунлари блиц йўналишида баҳслар бўлиб ўтади. Унда шахматчилар ўзаро икки марта дона суришади.

Ғолиблар қуйидагича мукофотланади:

Рапид йўналишида:

1-ўрин — 10 минг АҚШ доллари;
2-ўрин — 6 минг АҚШ доллари;
3-ўрин — 3 минг АҚШ доллари.

Блиц йўналишида:

1-ўрин — 7,5 минг АҚШ доллари;
2-ўрин — 4 минг АҚШ доллари;
3-ўрин — 2,5 минг АҚШ доллари.