Hindistonning Kalkutta shahrida Tata Steel Chess India turniri bo‘lib o‘tmoqda. Mukofot jamg‘armasi 41500 AQSH dollarini tashkil etadigan turnirda o‘zbekistonlik Nodirbek Abdusattorov ham ishtirok etayotganidan xabaringiz bor.

Bugun musobaqaning rapid yo‘nalishida yaga 3 ta tur o‘yinlari o‘tkazildi. Abdusattorov mezbon sportchilari — Nixal Sarin va Vidit Santosh Gujarathi bilan durang qayd etdi. Kun yakunida hamyurtimiz yana bir hindistonlik shaxmatchi Sunildut Narayananni mag‘lub etdi.

Natijada Nodirbekning ochkolari 4,5 taga yetdi. Bugun 3 ta o‘yinda g‘alaba qozongan Magnus Karlsen 5 ochko bilan peshqadam bo‘lib turibdi. AQSHlik Uesli So 3,5 ochko bilan uchinchi o‘rinni egallab turibdi.

Ertaga rapid yo‘nalishida g‘oliblar aniqlanadi. Abdusattorovni Ueslo So, Arjun Erigaisi va Magnus Karlsenga qarshi janglar kutib turibdi.

16 va 17 noyabr kunlari blis yo‘nalishida bahslar bo‘lib o‘tadi. Unda shaxmatchilar o‘zaro ikki marta dona surishadi.

G‘oliblar quyidagicha mukofotlanadi:

Rapid yo‘nalishida:

1-o‘rin — 10 ming AQSH dollari;
2-o‘rin — 6 ming AQSH dollari;
3-o‘rin — 3 ming AQSH dollari.

Blis yo‘nalishida:

1-o‘rin — 7,5 ming AQSH dollari;
2-o‘rin — 4 ming AQSH dollari;
3-o‘rin — 2,5 ming AQSH dollari.