"Ювентус" ярим ҳимоячиси Уэстон Маккенни клуб билан шартномасини узайтириш бўйича таклиф олди.
Американинг амалдаги шартномаси 2026 йилнинг ёзида тугайди. Инсайдер Николо Скиранинг хабар беришича, "кекса синьора" раҳбарияти аллақачон ярим ҳимоячи билан янги шартнома борасида музокараларни бошлаб юборган. 26 ёшли футболчига 2028 йилгача мўлжалланган ва автоматик равишда 2029 йилгача узайтириш имкониятини ўз ичига олган шартнома таклиф қилинган.
Уэстон Маккенни бу мавсумда Тиаго Мотта жамоаси сафида 17 та ўйинда майдонга тушиб, 4 та гол урди ва 2 та голли узатмани амалга оширди.
