Фарғонанинг "Нефтчи" клубини 26 йилдан буён бошқариб келган Юрий Саркисян жамоанинг кўплаб муваффақиятсиз ўйинларидан сўнг яқинда истеъфога чиқарилганидан хабарингиз бор. Бугун олган маълумотларимизга қараганда, унинг ўрнида эндиликда Амет Мемет фаолият олиб бориши мумкин.
Аввалроқ "Нефтчи" ПФК Саркисян ўрнига Евгений Шохиннинг бош мураббий бўлганлигини расман эълон қилган эди. Аммо куни кеча Олий лига 9-тур доирасида Олмалиққа сафар қилган фарғоналиклар 1:3 ҳисобида мағлубиятга учрашди. Тўғри, ўйинда "Нефтчи"ни янги бош мураббий бетоблиги сабаб ўзи майдонга бошлаб туша олгани йўқ. Унинг ўрнига Шамиль Исеев вазифани бажарган бўлса-да, афтидан, клуб раҳбарлари янги бош мураббий қидиришда давом этишмоқда.
Бизга хабар беришларича, "Бунёдкор" ва "Андижон" клубларидаги фаолияти билан жамоатчиликка таниш мураббий Амет Мемет "Нефтчи" бош мураббий этиб тайинланиши мумкин. Ҳозирда ушбу мутахассис билан музокаралар олиб борилмоқда.
Эслатиб ўтамиз, даставвал "Пахтакор" бош мураббийи Мурод Исмоилов номзоди ҳам кўриб чиқилганди.
