“Ан-Наср” ҳужумчиси Криштиану Роналду Элит Осиё Чемпионлар Лигаси доирасидаги “Истиқлол”га қарши баҳс учун қайдномага киритилмади.

Олдинроқ футболчининг бу қарори 2023 йилда юз берган воқеа билан боғлиқ экани айтилган эди. Ўшанда Роналду мухлисаси, ногирон қиз Фотима Ҳамамийни қучоқлаб, ўпган. Бу ҳаракатлар Эрон қонунларига зид ҳисобланади.

Кейинчалик ОАВ орқали Криштиану яна Эронга борса қамоқ ёки дарра уриш жазоси кутаётгани ҳақида миш-мишлар тарқалганди.

Эрон элчихонаси эса ушбу хабарларга расмий муносабат билдирди:

"Биз Криштиану Роналдуга нисбатан суд қарори чиқарилганини қатъиян рад этамиз. Футболчи ва Фотима Ҳамамий ўртасидаги самимий учрашув Эрон халқи ҳамда мамлакат спорт расмийлари томонидан илиқ қабул қилинган", дея элчихонанинг баёнатини келтиради talkSPORT нашри.

Маълумот учун “Истиқлол” — “Ан-Наср” ўртасидаги баҳс кеча, 3 март куни Теҳрондаги “Озодий” стадионида бўлиб ўтди. Қизиқарли ўтган баҳсда ҳисоб очилмади — 0:0.