“An-Nasr” hujumchisi Krishtianu Ronaldu Elit Osiyo Chempionlar Ligasi doirasidagi “Istiqlol”ga qarshi bahs uchun qaydnomaga kiritilmadi.

Oldinroq futbolchining bu qarori 2023 yilda yuz bergan voqea bilan bog‘liq ekani aytilgan edi. O‘shanda Ronaldu muxlisasi, nogiron qiz Fotima Hamamiyni quchoqlab, o‘pgan. Bu harakatlar Eron qonunlariga zid hisoblanadi.

Keyinchalik OAV orqali Krishtianu yana Eronga borsa qamoq yoki darra urish jazosi kutayotgani haqida mish-mishlar tarqalgandi.

Eron elchixonasi esa ushbu xabarlarga rasmiy munosabat bildirdi:

"Biz Krishtianu Ronalduga nisbatan sud qarori chiqarilganini qat’iyan rad etamiz. Futbolchi va Fotima Hamamiy o‘rtasidagi samimiy uchrashuv Eron xalqi hamda mamlakat sport rasmiylari tomonidan iliq qabul qilingan", deya elchixonaning bayonatini keltiradi talkSPORT nashri.

Ma’lumot uchun “Istiqlol” — “An-Nasr” o‘rtasidagi bahs kecha, 3 mart kuni Tehrondagi “Ozodiy” stadionida bo‘lib o‘tdi. Qiziqarli o‘tgan bahsda hisob ochilmadi — 0:0.