«Kattaqo‘rg‘on» bosh murabbiyi Ilyos Zeytullayev Eldor Shomurodovning Italiyadagi faoliyati haqida fikr bildirdi. Zeytullayevning ta’kidlashicha, Shomurodovning Italiyadagi faoliyatini muvaffaqiyatsiz deb baholash noto‘g‘ri.
«Uning ko‘rsatkichlari juda yaxshi bo‘lgan. “Roma”ga yetib borish va u yerda o‘ynash har kimga ham nasib qilmaydi. Shuning uchun Italiyada unda nimadir o‘xshamadi, deyish noto‘g‘ri», — dedi murabbiy.
Zeytullayev Shomurodov Turkiyaga asosan doimiy ravishda o‘ynash istagi bilan ketgan, deb hisoblaydi.
«Meni Gasperinining qarori biroz hayron qoldirdi. Aksincha, Gasperini qo‘l ostida Eldor o‘ynaydi, deb o‘ylagandim. Bunday futbolchilar unga odatda yoqadi. Hozir Gasperini Shomurodovning Turkiyada qanday o‘ynayotgani va gol urayotganini ko‘rib, biroz tirsagini tishlayotgan bo‘lishi mumkin», — dedi u.
«Eldor — Yevropa darajasidagi futbolchi. U buni allaqachon isbotlagan», — deya qo‘shimcha qildi Zeytullayev.
