«Каттақўрғон» бош мураббийи Илёс Зейтуллаев Элдор Шомуродовнинг Италиядаги фаолияти ҳақида фикр билдирди. Зейтуллаевнинг таъкидлашича, Шомуродовнинг Италиядаги фаолиятини муваффақиятсиз деб баҳолаш нотўғри.

«Унинг кўрсаткичлари жуда яхши бўлган. “Рома”га етиб бориш ва у ерда ўйнаш ҳар кимга ҳам насиб қилмайди. Шунинг учун Италияда унда нимадир ўхшамади, дейиш нотўғри», — деди мураббий.

Зейтуллаев Шомуродов Туркияга асосан доимий равишда ўйнаш истаги билан кетган, деб ҳисоблайди.

«Мени Гасперинининг қарори бироз ҳайрон қолдирди. Аксинча, Гасперини қўл остида Элдор ўйнайди, деб ўйлагандим. Бундай футболчилар унга одатда ёқади. Ҳозир Гасперини Шомуродовнинг Туркияда қандай ўйнаётгани ва гол ураётганини кўриб, бироз тирсагини тишлаётган бўлиши мумкин», — деди у.

«Элдор — Европа даражасидаги футболчи. У буни аллақачон исботлаган», — дея қўшимча қилди Зейтуллаев.