ЎзПФЛ 2025 йилги мавсум бошланиши олдидан барчани Суперлиганинг медиа ва тижорат ҳуқуқларини ҳурмат қилишга чақирганди.
Бироқ, чемпионат стартидан сўнг Телеграм мессенжеридаги бир нечта каналлар Суперлига учрашувларини ноқонуний трансляция қилиши, Лига медиамаҳсулотларини рухсатсиз тарқатиш ҳолатлари кўзга ташланди.
Лига ушбу ҳолатлардан сўнг зудлик билан муаллифлик ва турдош ҳуқуқларни бузаётган бир нечта канал устидан Телеграм тармоғига расмий шикоят киритди. Ушбу мурожаатлар тармоқ маъмурияти томонидан асосли деб топилди ва ушбу каналларга расмий огоҳлантириш жўнатилди. Бу ҳолат яна такрорланадиган бўлса, кўп сонли обуначига эга бу каналлар блокланиши муқаррар.
Муаллифлик ва турдош ҳуқуқлар ҳимояси доим оғриқли мавзу бўлиб келган. Бу айниқса телетрансляциялар йўналишида яққол кўзга ташланади. Лига шундай вазиятда ҳам ўз ҳуқуқлари ҳимоясини таъминлашда қатъий давом этади ва барча контент яратувчилардан муаллифлик ва турдош ҳуқуқларни ҳурмат қилишни сўрайди.
