Португалия терма жамоаси ҳужумчиси Криштиану Роналдуга Гиннеснинг рекордлар китоби сертификати топширилди. 40 ёшли тўпурар терма жамоалар ўртасидаги ўйинларда рекорд даражада ғалаба қозонгани учун тақдирланди.
Португалия терма жамоаси либосида тажрибали тўпурар 132 та ғалабани нишонлашга улгурган. У бу кўрсаткич бўйича Испания терма жамоасининг собиқ ҳимоячиси Серхио Рамосни ортда қолдирди.
Эслатиб ўтамиз, Португалия терма жамоаси икки ўйин натижасига кўра Дания терма жамоасини мағлуб этиб, Миллатлар лигаси ярим финалига йўл олди. Нуфузли турнирнинг финал йўлланмаси учун Роналду ва унинг жамоадошлари Германия билан куч синашади. Терма жамоалар ўртасидаги баҳс июнь ойи бошида бўлиб ўтади.
