ЖЧ-2026 саралаш босқичи доирасида бўлиб ўтган Эрон-Ўзбекистон ўйинидан кейин Эрон матбуотида ёзилган баъзи мулоҳазаларни эътиборингизга ҳавола этамиз. "Aftab News" нашри ўзбекистонлик ёрим ҳимоячи Аббосбек Файзуллаев шаънига мақтов сўзларини ёзди.

"Ўзбекистон миллий жамоасининг ёш юлдузи Аббосбек Файзуллаев ҳимоячимиз Солиҳ Ҳарданий учун ҳақиқий бошоғриғи бўлди. У ўзининг кескин ҳаракатлари ва тўпни олиб юришдаги юқори маҳорат билан Эрон миллий жамоасининг ҳимоячисини босим остида ушлаб турди. Шунингдек, майдоннинг чап қанотидан берилган жарима зарбаси орқали Эрон дарвозасини ҳимоячилар ва дарвозабоннинг хатоси туфайли ишғол қила олди.  

Россиянинг ЦСКА Москва клубида тўп сураётган 21 ёшли вингер Европа жамоаларидан яхши таклифлар олган. Ўзбекистон миллий жамоасининг сўнгги ўйинларида энг самарали футболчилардан бири бўлиб, жамоани Жаҳон чемпионатига йўл олиш остонасига олиб келди. У саралаш босқичида 14 ўйин ўтказиб, 4 та гол урган. Бу ўзбек юлдузи ўзининг энг яхши ўйинларини Эрон ва Қатар каби гуруҳнинг етакчи жамоаларига қарши кўрсатиб, ёш бўлишига қарамай, ўз мамлакати учун муҳим футболчига айланди.  

Ўрунов, Файзуллаев, Ҳусанов ва бошқа ёш юлдузлар ёш бўлишига қарамай, жуда юқори сифатли ўйин намойиш этмоқда. Бу жамоанинг БАА ва Қатардан юқори ўрин эгаллаши ва ўз тарихида илк бор Жаҳон чемпионатига йўл олиши мумкинлиги асло кутилмаган ҳолат эмас. Бу ёш футболчиларнинг 2026 йилги Жаҳон чемпионатида иштирок этиши Ўзбекистон футболи ва унинг иқтидорли ўйинчилари учун катта трамплин бўлиши мумкин", — дейилади мақолада.