Аввал хабар берганимиздек, Ўзбекистон аёллар терма жамоаси Таиланддаги халқаро мусобақада иштирок этади.

Қитъамизнинг энг кучлилари жам бўлган мазкур турнир олдидан жамоа расмийлари иштирокида анъанавий митинг бўлиб ўтди. Унда расмийлар мусобақа ўтказилиши тартиби, ҳар бир терма жамоанинг либосларининг ранги ва бошқа деталларни муҳокама қилишди.

Ундан сўнг, бош мураббийлар иштирокида матбуот анжумани бўлиб ўтди ва мутахассислар ОАВ вакиллари саволларига жавоб беришди.

Таъкидлаш лозимки, барча рақиблар Ўзбекистон терма жамоаси ҳақида илиқ фикрлар билдиришди.

"Ассалому алайкум. Авваламбор, меҳмондўстлик учун мезбонларга миннатдорчилик билдирмоқчиман. Бизга барча шарт-шароитлар яратиб берилган. Ўйинларга яхши тайёргарлик кўряпмиз. Бу ерга таркибимизда бир қатор янги қизлар билан келганмиз ва ўйинда уларнинг реал имкониятларини синовдан ўтказиб оламиз".

Жаҳон чемпионатига саралаш вазифасини ўтаб берувчи Осиё Кубоги олдидан бундай кучли рақибларга қарши ўйнашдан қўрқмайсизми?

"Йўқ, нега қўрқишимиз керак? Аксинча, қитъа кубогидан аввал ютуқ ва камчиликларимизни кўриб оламиз. Яна бир бор таъкидлайман, таркибимизда янги номлар бор ва айнан шу каби кучли рақибларга қарши баҳсда улар нималарга қодирлиги ҳамда Осиё Кубогига қанчалик тайёрлигини билиш мумкин бўлади", - деди Ўзбекистон терма жамоаси бош мураббийи Фаррух Закиров.