Avval xabar berganimizdek, O‘zbekiston ayollar terma jamoasi Tailanddagi xalqaro musobaqada ishtirok etadi.

Qit’amizning eng kuchlilari jam bo‘lgan mazkur turnir oldidan jamoa rasmiylari ishtirokida an’anaviy miting bo‘lib o‘tdi. Unda rasmiylar musobaqa o‘tkazilishi tartibi, har bir terma jamoaning liboslarining rangi va boshqa detallarni muhokama qilishdi.

Undan so‘ng, bosh murabbiylar ishtirokida matbuot anjumani bo‘lib o‘tdi va mutaxassislar OAV vakillari savollariga javob berishdi.

Ta’kidlash lozimki, barcha raqiblar O‘zbekiston terma jamoasi haqida iliq fikrlar bildirishdi.

"Assalomu alaykum. Avvalambor, mehmondo‘stlik uchun mezbonlarga minnatdorchilik bildirmoqchiman. Bizga barcha shart-sharoitlar yaratib berilgan. O‘yinlarga yaxshi tayyorgarlik ko‘ryapmiz. Bu yerga tarkibimizda bir qator yangi qizlar bilan kelganmiz va o‘yinda ularning real imkoniyatlarini sinovdan o‘tkazib olamiz".

Jahon chempionatiga saralash vazifasini o‘tab beruvchi Osiyo Kubogi oldidan bunday kuchli raqiblarga qarshi o‘ynashdan qo‘rqmaysizmi?

"Yo‘q, nega qo‘rqishimiz kerak? Aksincha, qit’a kubogidan avval yutuq va kamchiliklarimizni ko‘rib olamiz. Yana bir bor ta’kidlayman, tarkibimizda yangi nomlar bor va aynan shu kabi kuchli raqiblarga qarshi bahsda ular nimalarga qodirligi hamda Osiyo Kubogiga qanchalik tayyorligini bilish mumkin bo‘ladi", - dedi O‘zbekiston terma jamoasi bosh murabbiyi Farrux Zakirov.