"Интер" ярим ҳимоячиси Хакан Чалханўғли Чемпионлар Лигаси ярим финалига чиқиш масаласига изоҳ берди. Чорак финалда унинг жамоаси "Бавария"дан устун келди. Германиядаги дастлабки учрашув "нерадзуррилар"нинг 2:1 ҳисобидаги ғалабаси билан якунланган бўлса, Миланда рақиблар 2:2 ҳисобидаги дурангга имзо чекишди. Ярим финалда "Интер" "Барселона" билан куч синашади.

- Ажойиб оқшом. Албатта, тер тўкишга тўғри келди, айниқса сўнгги дақиқаларда. Бунга тайёр эдик, "Бавария" бизни қийин аҳволга солиб қўйишини билардик. Уларнинг биринчи голига яхши муносабатда бўлдик. Ҳисоб 2:1 бўлганидан сўнг, биз ҳимояга ўтишга мажбур бўлдик, аммо ўзимизга ишонишда давом этдик," - дея Чалханўғлининг сўзларини келтиради UЕFA расмий сайти.