Ўзбекистон U-15 терма жамоаси "Ривожланиш кубоги" доирасидаги навбатдаги учрашувда Латвия устидан иродали ғалабага эришди. Учрашув драматик тарзда ривожланди ва йигитларимиз бир кишига кам бўлиб ўйнаган ҳолда тўлиқ бурилишга эришишди.
Беллашувнинг 28-дақиқасида Яҳёбек Насруллоев иккинчи сариқ карточкани олиб, майдондан четлатилди. Бу вазиятдан сўнг рақиб ташаббусни ўз қўлига олди ва 40-дақиқада Давидс Куракинс орқали ҳисобни очди. Биринчи бўлимда бошқа гол қайд этилмади.
Иккинчи таймни терма жамоамиз бир қатор алмашинувлар билан бошлади ва бу ўзгаришлар ўз самарасини тез орада берди. 49-дақиқада Абубакр Маматов ҳисобни тенглаштирди. Ўйин сўнгида яна бир неча стратегик ўзгаришлар амалга оширилди.
85-дақиқада Ҳажиакбар Зулфиқоров пенальтидан аниқ зарба бериб, жамоамизни ҳисобда олдинга олиб чиқди. Қўшилган дақиқаларда эса Рўзимурод Рўзимуродов ўйиннинг тақдирини мустаҳкамлаб қўйди — 90+4 дақиқада у жамоамизнинг учинчи голини киритди.
U-15 “Ривожланиш кубоги"
Латвия - Ўзбекистон - 1:3
Голлар: Давидс Куракинс (40') — Абубакр Маматов (49'), Ҳожиакбар Зулфиқоров (85', пенальти), Рўзимурод Рўзимуродов (90+4')
Четлатиш: Яҳёбек Насруллоев (28)
