Ҳакам қарорларини таҳлил қилишга ихтисослашган компанияга тегишли X ижтимоий тармоғидаги Archivo VAR аккаунти Ла Лиганинг 35-туридан ўрин олган “Барселона” — “Реал” (4:3) учрашувида юзага келган икки тортишувли вазиятни таҳлил қилди.

Таҳлилларга кўра, бош ҳакам Алехандро Эрнандес учрашув охирида “Реал” дарвозасига пенальти тайинламагани билан хатоликка йўл қўйган. Ўша вазиятда “Барселона” ҳужумчиси Ферран Торреснинг зарбаси “Реал” ярим ҳимоячиси Орельен Тчуамени қўлига теккан.

«Тчуамени қўлини очиқ ҳолда ушлаб туриб, ундан олиб қочишга ҳаракат ҳам қилмаган ҳолда Ферраннинг яқин масофадаги зарбасини тўсиб қолди. VAR томонидан вазиятни қайта кўриб чиқиш таклиф қилинган бўлса-да, ҳакам ўз қарорини ўзгартиришни истамади», — деб ёзади Archivo VAR.

Шунингдек, 90+6-дақиқада Эрнандес “Барселона” яримҳимоячиси Фермин Лопеснинг голини қўл билан ўйнагани учун бекор қилгани ҳам нотўғри қарор экани таъкидланган.

«Ферминнинг қўлига тегиши қоидабузарлик сифатида қаралиши лозим бўлмаган вазиятлар қаторига киради», — дейилади Archivo VAR ҳисоботида.