"Астон Вилла" клуби ҳужумкор ярим ҳимоячиси Морган Роджерс Англия Премьер-лигасининг бошқа клубига ўтиши мумкин.
Бирмингемликлар чемпионатни олтинчи ўринда якунлади ва Чемпионлар Лигаси йўлланмасини қўлга кирита олмади. Шу муносабат билан, talksport хабарига кўра, "Вилла" трансфер бозорида талабгир бўлган Рожерсни сотишига тўғри келиши мумкин. 22 ёшли футболчига Лондоннинг "Арсенал" ва "Тоттенхэм", шунингдек, "Ньюкасл" клублари даъвогарлик қилмоқда. Истиқболли инглизнинг нархи - 60 млн евро.
Морган Рожерс "Астон Вилла"нинг ўтган мавсумдаги 54 ўйинида 14 гол урди ва 15 голга узатма берди. Футболчининг амалдаги шартномаси 2030 йилгача мўлжалланган.
