"Ливерпуль" вингери Луис Диас яқин кунларда "Бавария"нинг янги аъзосига айланади. Бугун, душанба куни футболчи Мюнхенга учиб боради, сешанба куни эса трансферни якунлаш учун зарур бўлган тиббий кўрикдан ўтади, деб хабар бермоқда журналистлар Тоби Альтшеффл ва Хайко Нидерер. Аввал хабар қилинганидек, колумбиялик футболчининг трансфери немис грандига 75 млн еврога тушади.
Луис Диас "Ливерпуль" сафида 2022 йил бошидан буён тўп тепиб келмоқда - ўшанда мерсисайдликлар уни "Порту"дан 49 млн еврога харид қилишганди. 28 ёшли футболчининг айни дамдаги нархи нуфузли "Transfermarkt" портали томонидан 70 млн еврога баҳоланмоқда.
Диас ўтган мавсумда Арне Слот жамоаси сафида 50 та ўйинда майдонга тушиб, 17 та гол урди ва 8 та голли узатмани амалга оширди.
