Индонезия ўсмирлар терма жамоаси футболчиси Мирзула Фиржатуллоҳ Тожикистон жамоасига қарши ўртоқлик учрашувида голини нишонлаётиб, стадиондаги уч метрлик чуқурликка йиқилиб тушди.
Ўйин 12 август сешанба куни Индонезиянинг Делисерданг шаҳрида бўлиб ўтди ва 2:2 ҳисобида якунланди. 16 ёшли Фиржатуллоҳ 34-дақиқада гол урди, сўнгра ҳаяжондан мухлислари томон югурди-ю, майдон билан трибуналар орасидаги чуқурликка тушиб кетди. Бироқ, бу ҳодисадан кейин Фиржатуллоҳ ўйинни давом эттира олди ва 59-дақиқада алмаштирилди.
Кейинроқ Индонезия терма жамоаси бош мураббийи Нову Арианто футболчининг оддий мушак тортишишини бошдан кечирганини ва ҳозирда аҳволи яхши эканлигини маълум қилди.
