"Интер" ҳимоячиси Бенжамин Паварнинг манфаатларини ҳимоя қилувчи агент Пини Захави ўтган ҳафта охирида Барселонада "кўк-анорранглилар" президенти Жоан Лапорта билан учрашиб, франциялик футболчини трансфер қилиш имкониятини муҳокама қилди. Бу ҳақда Sport.es нашри хабар берди.
Манбанинг хабарига кўра, бу борада ҳозирча ҳеч қандай ўзгаришлар кузатилмаган, чунки каталонияликлар учун асосий вазифа - трансфер ойнасининг сўнгги кунларида мавжуд футболчиларини рўйхатдан ўтказиш. Қайд этилишича, "Барселона" бош мураббийи Ханс-Дитер Флик Паварни "Бавария"да бирга ишлагани учун яхши билади.
Ўтган мавсумда 29 ёшли ҳимоячи барча турнирларда 38 та ўйин ўтказиб, битта гол ва битта голли узатмани амалга оширган. Transfermarkt порталида берилган маълумотларга кўра, футболчининг бозор қиймати 25 миллион еврони ташкил қилади.
