Испания Примерасининг 7-туридан ўрин олган «Барселона» — «Реал Сосьедад» учрашуви якунига етди. Ушбу баҳсда каталонияликлар 2:1 ҳисобида ғалаба қозонди. Ўйин Барселонадаги «Олимпик Льюис Компанис» стадионида бўлиб ўтди.

Флик шогирдлари ўйинни фаол бошлаб, бир қатор хавфли вазиятлар яратишди. Аммо меҳмонлар посбони кетма-кет 4 та хавфли вазиятни бартараф этишга муваффақ бўлди. 31-дақиқада эса Альваро Одриосола ҳисобни очиб, басклар жамоасини олдинга олиб чиқди.

Жюль Кунде 43-дақиқада жавоб голини урди. У бурчакдан етказилган тўпни боши билан рақиб дарвозасига жойлаб қўйди.

Иккинчи бўлим бошида Ламин Ямал майдонга тушгач, "кўк-анорранглилар"нинг ҳужумлари янада кескин тус ола бошлади. Айнан унинг узатмасидан кейин 59-дақиқада Роберт Левандовски "Барса"ни олдинга олиб чиқди.

Ўйин тугашига 3 дақиқа қолганида "Барселона" учинчи голни уриши мумкин эди. Аммо Левандовски томонидан яқин масофадан йўлланган зарба натижасида тўп тўсинга тегиб қайтди.

Ушбу ғалабадан кейин «Барселона» 19 очко билан Ла Лига турнир жадвалида пешқадамга айланди. «Реал Сосьедад» эса 5 очко билан 17-поғонада жойлашган.

Кейинги турда каталон клуби 5 октябрь куни сафарда «Севилья»га қарши баҳс олиб боради. Басклар эса ўша куни ўз майдонида «Райо Вальекано»ни қабул қилади.

Испания — Примера. 7-тур
28 сентябр, якшанба. 21:30 МСК
«Барселона» - «Реал Сосьедад» - 2:1
Голлар: 0:1 - Одриосола – 31'; 1:1 - Кунде – 43'; 2:1 - Левандовски – 59'