АҚШ, Мексика ва Канада майдонларида ўтадиган футбол бўйича Жаҳон чемпионати чипталари нархида кўтарилиш бўлган. The Telegraph нашрининг ёзишича, 2026-йилги мундиал учун чиқарилган чипталар нархи аввалги мундиал билан солиштирганда кескин фарқ қилади.

Маълумотларга кўра, очилиш ўйини учун чипталар нархи 370 доллардан бошланади, энг қиммат ўринлар эса 1 800 долларга етади. Таққослаш учун, 2022 йил Қатарда ўтган мундиалда очилиш ўйинига кириш нархлари 55–618 доллар атрофида бўлган.

Финал баҳси Нью-Йоркда бўлиб ўтади ва ушбу ўйин учун энг арзон чипта 2 000 доллардан бошланади. Бу 2022-йилги энг арзон финал чиптасидан 10 баробар қиммат эканлигини кўриш мумкин. Ўртача нарх эса 3 900 долларга етмоқда.

“Саёҳат, яшаш ва бошқа харажатларни қўшсак, бу тарихдаги энг қиммат Жаҳон чемпионати бўлади. Турнирни стадиондан томоша қиладиган мухлислар учун бунинг ўрнини ҳеч нарса боса олмайди. Агар финал учрашуви учун энг арзон чипта 2 000 доллар бўлса, олдиндан қайси жамоалар ўйнашини билиб бўлмайдиган ўйин учун жуда катта сарф бўлади”, дейилади The Telegraph баёнотида.

Интернетда тарқалган стадион жойлашуви схемаларига кўра, 60 доллар атрофидаги чипталарни топиш деярли имконсиз бўлиб қолган.

Маълумот учун, 2026-йилги Жаҳон чемпионати тарихда илк бор 48 та жамоа иштирокида ўтказилади. Турнир 11 июндан 19 июлгача АҚШ, Канада ва Мексика майдонларида бўлиб ўтади. Мусобақага қуръа ташлаш маросими жорий йилнинг 5 декабрь куни АҚШнинг Вашингтон шаҳридаги Кеннеди марказида бўлиб ўтади.