AQSH, Meksika va Kanada maydonlarida o‘tadigan futbol bo‘yicha Jahon chempionati chiptalari narxida ko‘tarilish bo‘lgan. The Telegraph nashrining yozishicha, 2026-yilgi mundial uchun chiqarilgan chiptalar narxi avvalgi mundial bilan solishtirganda keskin farq qiladi.

Ma’lumotlarga ko‘ra, ochilish o‘yini uchun chiptalar narxi 370 dollardan boshlanadi, eng qimmat o‘rinlar esa 1 800 dollarga yetadi. Taqqoslash uchun, 2022 yil Qatarda o‘tgan mundialda ochilish o‘yiniga kirish narxlari 55–618 dollar atrofida bo‘lgan.

Final bahsi Nyu-Yorkda bo‘lib o‘tadi va ushbu o‘yin uchun eng arzon chipta 2 000 dollardan boshlanadi. Bu 2022-yilgi eng arzon final chiptasidan 10 barobar qimmat ekanligini ko‘rish mumkin. O‘rtacha narx esa 3 900 dollarga yetmoqda.

“Sayohat, yashash va boshqa xarajatlarni qo‘shsak, bu tarixdagi eng qimmat Jahon chempionati bo‘ladi. Turnirni stadiondan tomosha qiladigan muxlislar uchun buning o‘rnini hech narsa bosa olmaydi. Agar final uchrashuvi uchun eng arzon chipta 2 000 dollar bo‘lsa, oldindan qaysi jamoalar o‘ynashini bilib bo‘lmaydigan o‘yin uchun juda katta sarf bo‘ladi”, deyiladi The Telegraph bayonotida.

Internetda tarqalgan stadion joylashuvi sxemalariga ko‘ra, 60 dollar atrofidagi chiptalarni topish deyarli imkonsiz bo‘lib qolgan.

Ma’lumot uchun, 2026-yilgi Jahon chempionati tarixda ilk bor 48 ta jamoa ishtirokida o‘tkaziladi. Turnir 11 iyundan 19 iyulgacha AQSH, Kanada va Meksika maydonlarida bo‘lib o‘tadi. Musobaqaga qur’a tashlash marosimi joriy yilning 5 dekabr kuni AQSHning Vashington shahridagi Kennedi markazida bo‘lib o‘tadi.