Биринчи лиганинг дастлабки босқичини биринчи ўринда тугатган Муборакнинг “Машъал” жамоаси айни пайтда таътилда. “Газчилар” 19 июль куни Тошкентда йиғилишади ва шу куннинг ўзидаёқ иккинчи босқич олдидан тайёргарликни бошлаш учун Тошкент вилоятининг тоғли ҳудудига йўл олишади.
Футболчилар олти кун мобайнида тоғли ҳудудда жисмоний тайёргарлик машқларини олиб боришади. Клуб бош директори Илҳом Қурбоновнинг маълум қилишича, ҳозирча “Машъал”ни ҳеч ким тарк этгани йўқ. Фақат Косоннинг “Аланга” жамоасидан ярим ҳимоячи Ойбек Полвонов таркибга келиб қўшилган. Агар бу футболчи кўрикдан яхши ўтса, мавсумнинг иккинчи ярмини “Машъал”да ўтказади.
Ҳозирда “Машъал” бош мураббийи Александр Хомяков ватани Россияга жўнаб кетган. Мураббий 17 июль куни Тошкентга қайтиб келади. Эслатиб ўтамиз, муборакликлар навбатдаги босқичнинг дастлабки икки турини сафарда ўтказишади. Аввалига жамоамиз “Пахтакор-2” меҳмони бўлса, кейин “Оқтепа” билан куч синашади.
