"Тоттенхэм" форварди Доминик Соланке қишки трансферлар ойнасида жамоани тарк этиши мумкин. Бу ҳақда Football Insider нашри хабар бермоқда.
Манбага кўра, "шпорлар" бош мураббийи Томас Франк 28 ёшли ҳужумчининг ўйинларидан хурсанд эмас, шу сабабли у январь ойидаёқ сотиб юборилиши мумкин. "Тоттенхэм" қишда янги тўпурарни ўз сафига қўшиб олмоқчи, бироқ клубдагилар буни амалга ошириш осон бўлмаслигини тушунишмоқда. Январь ойи йирик битимлар тузиш учун мураккаб давр ҳисобланади.
Жорий мавсумда Соланке барча мусобақаларда атиги учта ўйинда майдонга тушди ва голли ҳаракат қилмади. "Тоттенхэм" футболчининг нархини тахминан 69 миллион еврога баҳоламоқда.
