Бразилиянинг Рио-де-Жанейро шаҳри ҳукумати дунёга машҳур «Маракана» стадионини сотувга қўйган. Бу ҳақда РМС Спорт нашри хабар берди.

Маҳаллий ҳокимият бу қарор орқали стадионни сақлаш харажатларидан қутулиш ва 1,89 миллиард евролик минтақавий қарзнинг бир қисмини ёпишни мақсад қилган. Рио-де-Жанейро штати қонунчилик кенгаши шаҳар иқтисодий таназзулдан чиқиш учун маблағларни тежаш чораларини кўрмоқда. Кенгаш президенти Родриго Аморимнинг айтишича, ҳукумат «Маракана»ни сақлаш учун ҳар бир ўйинга ўртача 160 минг евро сарфлайди. Амалдорларнинг фикрича, бу қарор минтақа учун муҳим аҳамиятга эга, чунки Рио-де-Жанейро 2026 йилгача қарзини тўлиқ тўлаши лозим.

Бу «Маракана»нинг илк бор сотув масаласида тилга олиниши эмас. 2011 йилда Бразилиянинг энг бой шахсларидан бири ҳисобланган Эике Батиста стадионни сотиб олишга уриниб кўрган, бироқ битим амалга ошмаган.

«Маракана» ҳозирда Бразилиянинг энг машҳур жамоаларидан «Фламенго» ҳамда «Флуминенсе»нинг уй стадиони ҳисобланади. Шунингдек, у ерда Бразилия терма жамоаси ҳам ўз ўйинларини ўтказади.

Ушбу стадион 1950 йилги Жаҳон чемпионатининг тарихий финалига мезбонлик қилган. Ўша баҳсда Уругвай Бразилияни мағлуб этиб, чемпионликни қўлга киритган эди. Шунингдек, «Маракана» 2014 йилги Жаҳон чемпионати финали ва 2016 йилги ёзги Олимпия ўйинларининг футбол баҳслари финалини ҳам қабул қилган. Арена сиғими — 78 минг томошабинга мўлжалланган.