«Ливерпуль» ҳужумчиси Муҳаммад Салоҳ Саудия Арабистони клублари учун энг устувор трансфер мақсади бўлиб қолмоқда. У ерда 33 ёшли футболчига йилига тахминан 150 миллион фунт (170 миллион евро) миқдорида маош таклиф қилинган. Бу ҳақда TBR Football хабар берди.

Манба маълумотига кўра, мисрлик футболчига келажакда клубда улушга эга бўлиш ҳуқуқи ва туризм бўйича элчи сифатида фаолият юритиш имконияти ҳам таклиф этилмоқда.

Хабарда таъкидланишича, агар Салоҳ ушбу таклифни қабул қилса, у «Ан-Наср» ҳужумчиси Криштиану Роналду даражасида маош олади. Роналдунинг йиллик иш ҳақи тахминан 175 миллион фунт (200 миллион евро) деб баҳоланган.

Жорий мавсумда Салоҳ барча мусобақаларда 13та ўйинда майдонга тушиб, 4та гол урди ва 3та голли узатма берди. Футболчининг клуб билан амалдаги шартномаси 2027 йил ёзигача мўлжалланган. Transfermarkt маълумотларига кўра, Салоҳнинг бозор қиймати 45 миллион еврони ташкил этади.