Эртага, 3 ноябрь куни Қатар мамлакатида FIFA U-17 Жаҳон чемпионати старт олади. Унда Исломбек Исмоилов бошқарувидаги Ўзбекистон U-17 терма жамоаси Осиё чемпиони сифатида иштирок этади.
Бугун турнир олдидан иштирокчи жамоалар расмийлари иштирокида учрашув бўлиб ўтди. Унда ФИФА ва маҳаллий ташкилий қўмита томонидан учрашувга оид масалалар, хусусан, регламент, тиббиёт, хавфсизлик, медиа ва маркетинг йўналишлари юзасидан тушунтириш ва эслатмалар бериб ўтилди.
Маълумот ўрнида, 17 ёшгача футболчилар ўртасидаги FIFA Жаҳон чемпионати жорий йилнинг 3–27 ноябр кунлари Доҳа шаҳридаги “Espayr” академияси майдонларида бўлиб ўтади. Финал учрашуви эса “Халифа” халқаро стадионида ўтказилади. Ўзбекистон U-17 терма жамоаси турнир доирасидаги илк учрашувни 5 ноябрь куни Парагвайга қарши ўтказади.
