“Интер Майами” ҳужумчиси ва сардори Лионель Месси 2026-йилги Жаҳон чемпионатида иштирок этиш масаласида ўз фикри билан ўртоқлашди.

Унинг сўзларига кўра, бу қарорга энг катта таъсир қилувчи омил — ўйнаш истаги ва жисмоний ҳолат бўлади:

“Энг аввало, бу истак билан боғлиқ. Ҳозирги кунда менда катта истак бор. Лекин ўзимни яхши ҳис қилишим, жамоага фойда келтиришим ва энг юқори даражада ўйнашим ҳам муҳим. Терма жамоа сафида ўйнаш — доим алоҳида туйғу, айниқса Жаҳон чемпионатида. Ўйлайманки, бу турнир ўзига хос бўлади: ташкилот даражаси юқори, лекин мамлакатлар орасидаги парвозлар бир оз чарчатади. Шунга қарамай, яна Жаҳон чемпионатида иштирок этиш, қўлга киритган унвонни ҳимоя қилсак, ажойиб бўларди”, деди Месси журналист Фабрицио Романо билан суҳабтда.

Эслатиб ўтамиз, Месси Аргентина терма жамоаси билан 2022-йилги Жаҳон чемпионатида ғалаба қозонган бўлиб, финалда Францияни пеналтилар сериясида мағлуб этган эди.

Маълумот учун, ҳужумчи жорий мавсум “Интер Майами” сафида жами 45 та ўйинда майдонга тушиб, 40 та гол ҳамда 19 та голли узатма муаллифига айланган.