"Манчестер Сити" ҳужумчиси Эрлинг Холанд ўзини португалиялик ҳужумчи Криштиану Роналду ва аргентиналик Лионель Месси даражасида кўриши ҳақидаги саволга жавоб берди.
"Йўқ, умуман йўқ. Мен улардан узоқдаман. Ҳеч ким яқинлаша олмайди, шунинг учун йўқ", - дея норвегиялик футболчининг сўзларидан иқтибос келтиради ВВС.
"Манчестер Сити" бош мураббийи Хосеп Гвардиола аввалроқ Холанд Месси ва Роналду билан бир савияда ўйнаётганини айтди. Бироқ, мутахассиснинг фикрича, фарқ шундаки, аргентиналик ва португалияликлар 15 йилдан бери шу ишни қилишмоқда.
Холанд 2022 йилдан бери "шаҳарликлар" сафида ўйнаб келмоқда. Жорий мавсумда 25 ёшли норвегиялик футболчи "Манчестер Сити" сафида барча турнирларда 13 та ўйинда майдонга тушиб, 17 та гол урди ва 1 та голли узатмани амалга оширди.
