Англиянинг “Манчестер Сити” клуби ҳужумчиси Эрлинг Ҳоланд фаолиятини бошқа лигада давом эттириши мумкин. Defensa Central нашрининг ёзишича, “шаҳарликлар” бош мураббийи Хосеп Гвардиола норвегиялик футболчининг “Реал Мадрид”га ўтиш истагидан норози бўлмоқда.

Хабарларга кўра, Гвардиола Ҳоланднинг шартномасига товон пули бўйича банд киритилишига қарши чиққан ва мазкур сабаб ортидан раҳбарият билан тортишув юзага келган. Маълумки, Ҳоланд ва “Сити” ўртасидаги шартномага 2024-йилдан бошлаб 200 миллион евролик товон пули банди киритилган. Бу банд орқали Англия Премьер Лигаси ташқарисидаги клублар ҳужумчини сотиб олиш имконига эга бўлади. Шу билан бирга, Ҳоланд қанча узоқ “Сити” сафида қолса, товон суммаси камайиб боради.

Гвардиола эса Чемпионлар Лигасидаги асосий рақобатчи бўлган “Реал” ушбу бандни фаоллаштириши мумкинлигидан хавотирда. Ҳоланд эса ҳеч қачон “қаймоқранглилар”га мухлислик қилишини яширмаган. У доимо “Реал”нинг йирик совринлар учун курашиш қобилиятини юқори баҳолайди ва интервьюларида ўзининг кумири Криштиану Роналду эканини тан олган. Бундан ташқари, ҳужумчи Испанияни жуда ёқтиради ва бу мамлакатга тез-тез келиб туради.

“Реал” эса ҳужумчининг атрофидаги вазиятни диққат билан ўрганиб чиқмоқда. Агар клуб раҳбарияти Винисиус Жуниор билан янги шартнома бўйича келишувга эриша олмаса, уни 2026-йилда сотиб юборади. Унинг трансферидан тушган сумма Ҳоланд учун сарфланиши мумкин.

Маълумот учун, “Манчестер Сити” Ҳоландни 2022-йилда сотиб олган. Ҳужумчи жорий мавсумда барча мусобақалар доирасида 15 ўйинда майдонга тушиб, 19 та гол ва 1 голли узатмага муаллифлик қилган. 25 ёшли футболчининг клуб билан амалдаги шартномаси 2034-йилгача мўлжалланган. Transfermarkt маълумотига кўра, Ҳоланднинг бозор қиймати 180 миллион еврони ташкил этади.