Ҳиндистоннинг Гоа шаҳрида якунланиб бораётган шахмат бўйича жаҳон кубоги мусобақасида буун финал ва 3-ўрин учун баҳсларда жавоб партиялари ўтказилди.

Жавоҳир Синдаров бугун хитойлик Вей Йига қарши қора доналарда ўйнади. Спортчилар қисқа вақт ичида 30 та юришни амалга оширишди ва якунда дурангга имзо чекишди. Ғолиб номи эртага ўтказиладиган тай-брек партияларда аниқланади.

Учинчи ўрин учун кечган илк баҳсда Нодирбек Ёқуббоев россиялик Андрей Есипенкога имкониятни бой берган эди. Шу боис бўлса керак, ҳамюртимиз бугун бир қатор ҳужумкор юришлар орқали таваккалчиликка борди. Рақиб эса жуда аниқ юришларни топди. Оқибатда Есипенко бу сафар ҳам ғалаба қозонди.

Россиялик шахматчи 3-ўрин орқали жаҳон тожи учун талабгорлар мусобақаси йўлланмасини қўлга киритган бўлса, Ёқуббоев тўртинчи ўрин билан чекланди. Бу орқали Нодирбек 50 минг АҚШ долларига эга бўлди.